1 Athesalonike Ũhoro wa Ibuku Rĩĩrĩ

Ũhoro wa Ibuku Rĩĩrĩ

Itũũra rĩa Thesalonike nĩrĩo rĩarĩ itũũra inene thĩinĩ wa Makedonia, bũrũri ũmwe wa marĩa maathagwo nĩ thirikari ya Roma. Paũlũ nĩonanĩtie atĩ nĩwe mwandĩki wa ibuku rĩĩrĩ maita meerĩ (1:1; 2:18). Aathiire Thesalonike hĩndĩ ya rũgendo rwake rwa keerĩ rwa ũmĩceni. Nĩoimire kuo nĩ ũndũ wa gũũkĩrĩrwo nĩ Ayahudi, na agĩtũma Timotheo athiĩ akarute wĩra kanitha-inĩ ũyũ warĩ na andũ aingĩ a Ndũrĩrĩ. Timotheo nĩamũreheire ũhoro mwega wa wĩtĩkio wa andũ acio (3:6).

Kanitha ũyũ warĩ na mathĩĩna wacemanagia namo. Arũmĩrĩri amwe aguo nĩmatigĩte kũruta wĩra tondũ meeciiragia Mwathani aarĩ hakuhĩ gũcooka (4:11, 12). Andũ angĩ maarĩ na kĩeha nĩ ũndũ wa andũ ao arĩa maakuĩte mbere ya gũcooka gwa Kristũ (4:13-15). Nĩamataarire maikare marĩ na thayũ, magĩcookagia ngaatho hĩndĩ ciothe (5:18).

Mwandĩki

Ibuku rĩĩrĩ rĩandĩkirwo nĩ Mũtũmwo Paũlũ.

Ũrĩa Ibuku Rĩĩrĩ Rĩgayanĩtio

· Ngaatho cia Paũlũ kũrĩ Athesalonike

1:1-10

· Ũtungata wa Paũlũ kanitha-inĩ

2:1-16

· Gũtaarĩria kwa maũndũ kuuma Paũlũ oima Thesalonike

2:17–3:13

· Mathaithana ma mũtũũrĩre wa ũngai

4:1-12

· Gũũka gwa keerĩ gwa Kristũ

4:13–5:11

· Gũkaanania kwa mũthia

5:12-28

.