Ũhoro wa Ibuku Rĩĩrĩ
Thĩinĩ wa marũa maya ma keerĩ kũrĩ kanitha wa Thesalonike, Paũlũ ambĩrĩirie na gũcookeria Ngai ngaatho nĩ ũndũ wa wĩtĩkio na wendo wao (1:3). Akristiano a Thesalonike nĩmageragĩra mathĩĩna-inĩ maingĩ, no Paũlũ nĩameerire atĩ nĩ Ngai wageragia wĩtĩkio wao, no ũndũ ũcio ndwarĩ wa kũmaherithia (1:4, 5).
Nĩ kũrĩ mũndũ warĩ kũu Thesalonike woigaga atĩ nĩamũkĩrĩte marũa kuuma kũrĩ Paũlũ ma kuuga atĩ Mwathani nĩarĩkĩtie gũcooka rĩngĩ (2:2). Paũlũ nĩerire kanitha ndũkae kũheenio, nĩgũkorwo mũthenya wa gũcooka kwa Mwathani ndũgakinya ũrĩa Mũregi watho ataguũranĩirio (2:3).
Ningĩ Paũlũ nĩakaananirie ũgũũta (3:6-10), na akĩĩra kanitha wĩmenyerere arũmĩrĩri arĩa maaregaga gwathĩkĩra marũa maya. Paũlũ aarĩkirie marũa maya na ihooya (3:16).
Mwandĩki
Ibuku rĩĩrĩ rĩandĩkirwo nĩ Mũtũmwo Paũlũ.
Ũrĩa Ibuku Rĩĩrĩ Rĩgayanĩtio
· Kũũmanĩrĩria nĩ ũndũ wa gũcooka gwa Kristũ
1:1-12
· Maũndũ marĩa magekĩka mbere ya Mũthenya wa Mwathani gũkinya
2:1-12
· Morutani mangĩ, na gũkaanania
2:13–3:5
· Mũtũũrĩre wa Mũkristiano, na ngeithi cia mũthia
3:6-18
.