Ũhoro wa Ibuku Rĩĩrĩ
Marũa-inĩ maya ma Keerĩ ma Timotheo, Paũlũ aandĩkĩire Timotheo akĩmũtaara ta mwana wake thĩinĩ wa wĩtĩkio. Paũlũ nĩahooyagĩra Timotheo kaingĩ (1:2, 3) tondũ nĩendaga atuĩke mũthigari mwega wa Jesũ Kristũ, na erute kũũmĩrĩria mathĩĩna (2:1, 3). Paũlũ nĩagwetete nyina wa Timotheo na cũwe na marĩĩtwa mao, o na akaririkania Timotheo ũrĩa aamũigĩrĩire moko arĩ kĩonereria atĩ Roho wa Ngai nĩarĩmũtongoragia wĩra-inĩ wake.
Paũlũ nĩataarire Timotheo igũrũ rĩkoniĩ matukũ maritũ marĩa maakirie gũkinya, na ũrĩa andũ magaatiganĩria ũhoro ũrĩa wa ma na marege gwĩtĩkia atĩ Jesũ nĩwe Mwathani. Eerire Timotheo ndagatigithĩrie kũhunjia ndũmĩrĩri ya Ngai (4:2).
Paũlũ nĩamenyaga atĩ mũtũũrĩre wake warĩ hakuhĩ gũkinya mũthia, no nĩamenyaga atĩ nĩakarĩhwo nĩ ũndũ wa wĩhokeku wake (4:6-8).
Mwandĩki
Ibuku rĩĩrĩ rĩandĩkirwo nĩ Mũtũmwo Paũlũ.
Ũrĩa Ibuku Rĩĩrĩ Rĩgayanĩtio
· Paũlũ gũcookeria Timotheo ngaatho
1:1-5
· Paũlũ kũhe Timotheo ũtaaro
1:6–2:2
· Gũtaarĩria ũhoro wa ndungata njĩhokeku
2:3-26
· Mĩnyamaro ĩrĩa yatanyagwo
3:1-17
· Ciugo cia mũthia cia Paũlũ
4:1-22
.