Ũhoro wa Ibuku Rĩĩrĩ
Itũũra rĩa Efeso rĩarĩ itũũra inene rĩa gĩcukĩro kĩa marikabu mwena wa ithũĩro wa Asia Nini. Matukũ ma Paũlũ, itũũra rĩĩrĩ rĩarĩ rĩa kana kũneneha thĩinĩ wa bũrũri ũrĩa waathagwo nĩ Aroma. Ningĩ itũũra rĩĩrĩ nĩrĩoĩkaine ũhoro-inĩ wa ngai ya mũhianano yetagwo Aritemi na nĩyahooyagwo mũno (Atũm 19).
Paũlũ ambĩrĩirie marũa make kũrĩ Kanitha wa Efeso na kũmaririkania ũrutani mũnene wa ndũmĩrĩri yake. Kristũ aakuire mũtharaba igũrũ nĩguo atũkũũre kuuma mehia-inĩ (1:7, 8). No Ngai akĩmũriũkia kuuma gĩkuũ-inĩ, na rĩu aikarĩte guoko-inĩ kwa ũrĩo kwa Ngai kũu igũrũ (1:20, 21).
Ũrutani wa ibuku rĩĩrĩ nĩwonanagia atĩ Kristũ nĩwe watũmire Ayahudi na andũ-a-Ndũrĩrĩ matuĩke mũndũ ũmwe na ũndũ wa kweheria rũthingo rwa rũmena rũrĩa rwamagayũkanĩtie (2:14), akĩmanyiitithania magĩtuĩka hekarũ ya Ngai ĩrĩa theru, na nĩkuo Roho wa Ngai aikaraga (2:22). Ũndũ ũyũ nĩguo warĩ mũbango wa kuuma o tene (3:11). Mwathani nĩ ũmwe, na Roho wa Ngai nĩ ũmwe, na Ngai nĩ ũmwe, na nĩwe Ithe wa andũ othe (4:4, 5). Ũndũ ũyũ wonanagia atĩ Akristiano nĩmagĩrĩirwo nĩ gũikara ngoro ciao irĩ kĩndũ kĩmwe nĩguo mahote gũikara na thayũ mũndũ na ũrĩa ũngĩ (4:3).
Thĩinĩ wa icunjĩ ithatũ cia mũthia, Paũlũ nĩataarĩirie maũndũ marĩa maataanyĩtwo kuuma kũrĩ andũ arĩa meetĩtwo nĩguo matũũre mũtũũrĩre mwerũ (4:17–5:20). Maũndũ mangĩ Paũlũ ataaranĩte nĩ ũhoro ũkoniĩ mũtũũrĩre wa mũthuuri na mũtumia wake, mũikaranĩrie wa aciari na ciana, o na mũikaranĩrie wa ngombo na aathani a cio.
Paũlũ nĩarĩkĩrĩirie na kwĩra Akristiano mehumbe nguo cia mbaara nĩguo metiirie mbaara cia mũcukani (6:10-18).
Mwandĩki
Ibuku rĩĩrĩ rĩandĩkirwo nĩ Mũtũmwo Paũlũ.
Ũrĩa Ibuku Rĩĩrĩ Rĩgayanĩtio
· Mũbango wa Ngai na ũhonokio wa arĩa metĩkĩtie
1:1–2:22
· Hitho cia Ũhoro-ũrĩa-Mwega
3:1-21
· Mũtũũrĩre wa Mũkristiano thĩinĩ wa thĩ
4:1–5:21
· Ngwatanĩro cia Akristiano
5:22–6:9
· Akristiano kũrũa na mawaganu
6:10-24
.