Ũhoro wa Ibuku Rĩĩrĩ
Ibuku rĩa Atũmwo nĩrĩo ibuku rĩa keerĩ kwandĩkwo nĩ Luka thĩinĩ wa Kĩrĩkanĩro kĩrĩa Kĩerũ. Ibuku rĩa Atũmwo rĩnyiitithanagia mabuku marĩa mana ma Ũhoro-ũrĩa-Mwega na mabuku marĩa mangĩ ma Kĩrĩkanĩro kĩrĩa Kĩerũ.
Ibuku rĩa Luka rĩheanĩte ũhoro wa maũndũ mothe marĩa Jesũ aambĩrĩirie gwĩka na kũrutana kuuma mũthenya wa mbere nginya rĩrĩa oirwo agĩtwarwo igũrũ (1:1, 2). Luka athiĩte na mbere kũheana mathĩĩna marĩa atũmwo maatũnganire namo magĩathĩkĩra rĩathani rĩrĩa Jesũ aamaheire rĩa kũhunjia Ũhoro-ũrĩa-Mwega (1:8).
Atũmwo maambĩrĩirie kũhunjia Jerusalemu na Judea guothe, o nginya ituri cia thĩ. Maahunjirie Ũhoro-ũrĩa-Mwega matongoretio nĩ Roho Mũtheru, nake akĩmahotithia gũthiĩ mabũrũri maingĩ kũrĩa maatwarire ndũmĩrĩri njega ya Kristũ.
Ũhoro-ũrĩa-Mwega nĩwakinyĩire andũ a Ndũrĩrĩ, o na gũtuĩka nĩ kwarĩ na mathĩĩna ma andũ-a-Ndũrĩrĩ gwĩtĩkĩrwo nĩ Ayahudi atĩ nĩmangĩahonokire matambĩte gũtuĩka Ayahudi. Petero nĩaheanire ũhoro wa ũrĩa Ngai aamũtũmire gwa Korinelio, mũnene-wa-thigari-igana rĩmwe cia Aroma, athiĩ akamũhunjĩrie ũhoro wa Kristũ (11:1-18).
Kĩama gĩa kanitha nĩgĩacemanirie nĩguo kĩarĩrĩrie kana andũ-a-Ndũrĩrĩ no mahonoke matambĩte gũtuĩka Ayahudi. Andũ arĩa othe maarĩ mũcemanio-inĩ ũcio magĩĩtĩkanĩria atĩ Roho Mũtheru nĩamatongoragia mathiĩ makahunjĩrie andũ-a-Ndũrĩrĩ hamwe na Ayahudi Ũhoro-ũrĩa-Mwega wa Jesũ Kristũ (15:3-5).
Paũlũ nĩwe mũtũmwo ũrĩa wahunjirie ũhoro wa wĩtĩkio mabũrũri-inĩ maingĩ ma andũ a Ndũrĩrĩ. Paũlũ nĩakinyirie ndũmĩrĩri ya Kristũ itũũra inene rĩa Roma, rĩrĩa rĩarĩ na igweta inene ihinda-inĩ rĩu (28:16-31). Mwandĩki wa ibuku rĩĩrĩ nĩonanĩtie atĩ gũtirĩ ũndũ ũngĩgiria Ũhoro-ũrĩa-Mwega ũhunjio kũndũ guothe thĩ (28:30, 31).
Mwandĩki
Ibuku rĩrĩ rĩandĩkirwo nĩ Mũtũmwo Luka.
Ũrĩa Ibuku Rĩĩrĩ Rĩgayanĩtio
· Matukũ ma kĩambĩrĩria ma kanitha
1:1–5:42
· Kuongerereka gwa kũnyariirwo
6:1–9:31
· Maũndũ ma ũmĩceni ma Petero
9:32–12:25
· Rũgendo rwa Paũlũ rwa ũmĩceni rwa mbere
13:1–14:28
· Kĩũngano thĩinĩ wa Jerusalemu
15:1-41
· Rũgendo rwa Paũlũ rwa ũmĩceni rwa keerĩ
16:1–18:22
· Rũgendo rwa Paũlũ rwa ũmĩceni rwa gatatũ
18:23–21:14
· Paũlũ kũnyiitwo, na rũgendo rwake rwa gũthiĩ Roma
21:15–28:31
.