Ũhoro wa Ibuku Rĩĩrĩ
Marũa maya maandĩkĩirwo Akristiano arĩa maahurunjũkĩte kũrĩa guothe gwathanagwo nĩ thirikari ya Roma. Marũa maya makuhĩ maandĩkĩtwo marĩ ma gũtaara andũ igũrũ rĩa mũtũũrĩre wa o mũthenya.
Marũa maya maiyũrĩte mĩhaano ya kuonania wĩtĩkio ũkĩruta wĩra. Mataaro marĩa Jakubu aheanaga nĩ ta:
⁓ndũkoorwo nĩ hinya ũngĩkorwo ũrĩ na thĩĩna,
⁓ndũgakue ngoro rĩrĩa wĩtĩkio waku ũkũgerio,
⁓ndũgatuĩke wa kũrakaraga na ihenya,
⁓ndũkendage arĩa marĩ na ũtonga gũkĩra arĩa athĩĩni.
Jakubu nĩoigĩte atĩ wĩtĩkio wa ma nĩwonanagia mũtũũrĩre mwega o ta ũrĩa mũtĩ mwega ũciaraga maciaro mega no ndũciaraga mĩigua.
Mwandĩki
Ibuku rĩĩrĩ rĩandĩkirwo nĩ Jakubu, mũrũ wa nyina na Jesũ.
Ũrĩa Ibuku Rĩĩrĩ Rĩgayanĩtio
· Mũtũũrĩre wa ma wa wĩtĩkio
1:1-27
· Maciaro ma wĩtĩkio mĩtũũrĩre-inĩ ya andũ
2:1-13
· Wĩtĩkio na ciĩko
2:14-26
· Ũrutani wa kũmenyerera rũrĩmĩ
3:1-18
· Mũtũũrĩre wa wĩhokeku
4:1-17
· Kũmenereria ũtonga
5:1-6
· Kũrĩkĩrĩria kwa wĩhokeku
5:7-20
.