Ũhoro wa Ibuku Rĩĩrĩ
Marũa maya maandĩkĩirwo Tito, ũmwe wa andũ arĩa maahunjĩirio nĩ Paũlũ (1:9). Tito nĩateithagĩrĩria Paũlũ wĩra-inĩ wake wa kĩhunjio na nĩarutire wĩra nake itũũra-inĩ rĩa Efeso hĩndĩ ya rũgendo rwake rwa gatatũ rwa ũmĩceni. Thuutha-inĩ Paũlũ nĩamũtũmire athiĩ Korinitho agateithĩrĩrie Kanitha ũcio. Paũlũ arekererio kuuma njeera kũu Roma (Atũm 28), we hamwe na Tito nĩmathiire kũruta wĩra Gĩcigĩrĩra gĩa Kirete, kũrĩa Paũlũ aamũtigire athiĩ na mbere kũrĩkĩrĩria wĩra ũrĩa wabataranĩtie kũrutwo (1:5; 2:15; 3:12-13).
Marũa maya nĩmonanagia atĩ kanitha wa Kirete ndwarĩ na mũbango, na nĩ kwarĩ na etĩkia kũu kanitha-inĩ maabataire mũbango mwega wa wĩra. Paũlũ nĩataarĩirie ũhoro ũkoniĩ mũthuuri wa kanitha, o na ũhoro wa etĩkia arĩa angĩ kanitha-inĩ.
Tito aarĩ mũthiritũ wa Paũlũ wa hakuhĩ mũno, na aarĩ mũndũ wa Ndũrĩrĩ kuuma itũũra rĩa Antiokia. Aarĩ ũmwe wa arĩa maathiire na Paũlũ na Baranaba kĩũngano-inĩ kĩrĩa kĩarĩ Jerusalemu (Agal 2:1-3).
Mwandĩki
Ibuku rĩĩrĩ rĩandĩkirwo nĩ Mũtũmwo Paũlũ.
Ũrĩa Ibuku Rĩĩrĩ Rĩgayanĩtio
· Ngeithi ciake we mwene
1:1-4
· Ũhoro ũkoniĩ kwamũrwo kwa athuuri a Kanitha
1:5-16
· Ũhoro ũkoniĩ andũ arĩa etĩkia
2:1-15
· Mũtũũrĩre ũrĩa Akristiano mabataire gũtũũra
3:1-15
.