Ũhoro wa Ibuku Rĩĩrĩ
Mũnabii Isaia aarĩirie andũ ũhoro wa Ngai ihinda rĩa mĩaka mĩrongo ĩna, matukũ-inĩ ma athamaki ana a Juda. Ihinda-inĩ rĩu, ũthamaki wa Ashuri nĩwakĩrĩrĩirie kũgĩa na hinya. Mabũrũri maingĩ nĩmacookanĩrĩire hamwe nĩguo mahũũrane na bũrũri wa Ashuri, no mũthia-inĩ bũrũri ũcio ũkĩhoota bũrũri wa Isiraeli hamwe na mabũrũri mangĩ marĩa maarĩ hakuhĩ na Isiraeli, na andũ akuo magĩtwarwo ũkombo-inĩ.
Ndũmĩrĩri ĩrĩa ĩrĩ ibuku-inĩ rĩĩrĩ no ĩgayanio icunjĩ ithatũ. Gĩcunjĩ kĩa mbere (1–39) kĩheanaga ũhoro ũkoniĩ ũtheru wa Ngai na hinya wake ta Mũthamaki wa thĩ yothe. Ngai nĩarakarĩtio nĩ Juda nĩgũkorwo atongoria a thirikari maarĩ oingumania, andũ meendete haaro na makaaga kĩhooto.
Gĩcunjĩ gĩa keerĩ (40–55) kĩheanaga ũhoro wa ũrĩa Ngai aarĩirie andũ acio maaherithĩtio, na akĩmahe mwĩhoko. Ngai nĩendaga mamenye atĩ ngai cia mĩhianano itirĩ hinya, na atĩ Ngai we wiki nowe wa ma. Ngai nĩaheaga andũ a Isiraeli mwĩhoko atĩ mangĩagarũrũkire na mamũcookerere, nĩangĩamahonokirie kuuma kũrĩ wathani wa Babuloni na amacookie bũrũri-inĩ wao.
Nakĩo gĩcunjĩ gĩa gatatũ (55–66) kĩheanaga ũhoro wa ũrĩa Ngai erĩire andũ arĩa ehokeku mũtũũrĩre mwega wa matukũ ma thuutha. Kĩĩranĩro gĩkĩ to kũrĩ andũ a Juda, no nĩ kũrĩ o na andũ a Ndũrĩrĩ ingĩ. Matukũ ma marigĩrĩrio, Ngai nĩakoomba thĩ ĩngĩ ĩiyũrĩtwo nĩ gĩkeno, na ĩtarĩ na thĩĩna (65:17-19).
Mwandĩki
Mwandĩki wa ibuku rĩrĩ nĩ Isaia mũrũ wa Amozu.
Ũrĩa Ibuku Rĩĩrĩ Rĩgayanĩtio
· Ndũmĩrĩri nditũ ĩkoniĩ Juda na Jerusalemu
1:1–12:6
· Ũrathi ũkoniĩ mabũrũri
13:1–23:18
· Itua rĩa ciira wa Ngai thĩ yothe
24:1–27:13
· Ngai na andũ ake
28:1–33:24
· Muoroto wa Ngai harĩ itua rĩa ciira na ũhonokio
34:1–35:10
· Isaia, Hezekia, Ashuri, na Babuloni
36:1–39:8
· Ngai Mwene-Hinya na ciĩranĩro ciake cia ma
40:1–48:22
· Ũhoro-Mwega wa ndungata ya Mwathani
49:1–57:21
· Ngai arĩ Mũtuanĩri ciira na Mũhonokia
58:1–66:24
.